Kooxda Barcelona ayaa si weyn uga niyad jabsan kadib markii uu fashilmay qorshahii ay ku doonayeen inay kula soo wareegaan xiddiga garabka ka ciyaara ee Nico Williams, kaasoo go’aansaday inuu sii joogo kooxda Athletic Bilbao ilaa sanadka 2035.
Sida uu sheegay weriyaha Santi Ovalle, madaxda sare ee Barcelona waxay si toos ah farta ugu fiiqeen wakiilka ciyaaryahanka, Felix Tainta, iyagoo ku eedeeyay inuu burburiyay heshiis horey loo isla meel dhigay.
Barcelona waxay rumeysan tahay in Nico uu ogolaaday inuu ku biiro kooxda, balse wakiilkiisa ayaa la sheegay inuu keenay shuruudo cusub oo aan la filayn, taasoo keentay in wadahadalladii burburaan. Mid ka mid ah qodobada uu wakiilku ku adkeystay ayaa ahaa in heshiiska lagu daro fursad u ogolaanaysa Nico inuu si xor ah uga tago kooxda mustaqbalka—arrin ay Barcelona si cad u diiday.
Warar hoose oo laga helay gudaha kooxda ayaa tilmaamaya in Tainta uu si gaar ah u daneynayo mustaqbalka Athletic Bilbao, maadaama uu sidoo kale wakiil u yahay ciyaartoy kale oo muhiim u ah kooxdaas. Sidaas darteed, waxaa la rumeysan yahay inuu ka baqay inuu lumiyo xiriirka ganacsi ee uu la leeyahay Bilbao haddii Nico uu u wareego Barcelona.
Ugu dambeyn, Barcelona waxay si cad u muujisay in wakiilka Felix Tainta uu yahay sababta ugu weyn ee keentay in heshiiskii Nico Williams uu burburo.
