Deegaano Laga Xoreeyey Al-shabaad oo Taliyaha Ciidanka Lugta Xoogga Soomaaliya uu kormeer ku Tagay.

Taliyaha ciidanka Dhulka ee xoogga dalka Soomaaliyeed Jeneraal Sahal Cabdullaahi Cumar ayaa maanta kormeer dhiirrigelin ugu tagay ciidanka xoogga dalka ee ku sugan furimaha hore ee dagaalka aaga deegaanka Masaajid Cali Gaduud ee gobolka Shabeellaha Dhexe.

Goobaha uu maanta kormeerka ku tagay Jeneraal Sahal Cabdullaahi ayaa dhawaan uun ciidanka xoogga dalka iyo kuwa dadka deegaanka kala wareegeen kooxda Al-shabaab.

Taliyaha ciidanka dhulka ayaa ciidamada ku sugan jiida hore dagaalka ku bogaadiyey guulaha ay ka gaareen dagaalka ay kula jiraan Al-shabaab, wuxuna kula dardaarmay iney sii laba jibaaraan dagaalka inta laga ciribtirayo guud ahaan deegaanada ay kaga sugan yihiin kooxda gobolada dalka.

Jeneraalka ayaa sidoo kale ugu baaqay shacabka Soomaaliyeed iney kordhiyaan taageerada iyo garab istaaga ku aadan ciidanka xoogga dalka Soomaaliyeed ee dagaalka adag kula jira maleeshiyaadka Al-shabaab.

Si kastaba ha ahaate kormeerka taliyaha dhulka ayaa kusoo aadaya, iyadoo ciidamada dowladda iyo kuwa dadka deegaanka ay si weyn u kordhiyeen maalmahii lasoo dhaafay howlgalada ka dhanka ah Al-shabaabka ku sugan gobolada Hiiraan iyo Shabeellaha Dhexe.